Ekaitzak eragindako alerta meteorologikoa

Eremu irekietan sortzen da gehienbat ekaitzek pertsonentzako duten arriskua; beraz, mendialdean baldin bazaude, hauxe gomendatzen dizugu ekaitz batek eragindako arrisku-egoera baten aurrean:

• Muino, mendixka eta mendi-bizkarretatik jaistea.
• Ez joatea babes bila zuhaitz bakartien azpira.
• Hesi, burdin-hesi eta metalezko edozein gauzatatik aldentzea. Metalezko gauzarik ez ukitzea.
• Tximisten arriskua sumatzen baduzu, jar zaitez kukubilko, oinak elkartuta, besoak belaunen gainean gurutzatuta, eta burua besoen artean sartuta.
• Bizikletaz baldin bazoaz, utz ezazu alde batera, eta aldendu.
• Ekaitzak arrantzan ari zarela harrapatzen bazaitu, askatu berehala kanabera.
• Halaber, golfean ari bazara, aldendu makiletatik.
• Igerilekuan, ibaian edo hondartzan bainatzen ari bazara, irten berehala uretatik.
• Ez zaitez babestu eraikin ezegonkorretan, ezta bihitegi, hangar, estalpe edo kanpin-dendetan ere.

Gidatzen baldin bazoaz eta bat-batean ekaitzak harrapatzen bazaitu, gogora ezazu ibilgailu itxi bat babesleku ona izan daitekeela. Nolanahi ere, murriztu abiadura, kontu handiz gidatu eta ez zaitez gelditu ur-kopuru handia igaro daitekeen eremuetan.

Hiriguneetan ere badago tximista-arriskua.Beraz, kontuan izan behar da:

• Kalean, eraikinen aterpeak deskargen arriskutik babes gaitzakeela.
• Kontu handia izan behar dugula gure gainera adarrik, kartelik edo hormarik ez erortzeko.
• Etxe barruan, saihestu aire-korronteak, tximistak erakar baititzakete. Horregatik gomendatzen da ekaitza baldin badago ateak eta leihoak ixtea.
• Linternak, kandelak edo argiztapen autonomoko bestelako sistemak edukitzea komeni dela, argindarrik gabe geratzen bazara ere.
• Deskarga elektriko handia baldin badago, etxetresna elektrikoak eta telebistaren antena deskonektatu behar direla, tentsio-igoera batek kalte ez ditzan edo ez dezaten deskarga elektrikorik eragin.